Kiyovu Sports yatsinze ivuye inyuma, AS Kigali, ibitego 3-1, iyikuraho amanota atatu yatumye ikomeza kwigira imbere ku rutonde rw'agatenyo rwa Rwanda Premier League.

Uyu mukino wabereye kuri Kigali Pelé Stadium, i Nyamirambo mu Mujyi wa Kigali, guhera Saa Cyenda z’igicamunsi cyo kuri iki Cyumweru, tariki 15 Werurwe 2026.

Ni umukino watangiye ufunguye kandi urimo imbaraga no gusatira ku mpande zombi ndetse ba Rutahizamu ba AS Kigali barimo Arsene Tuyisenge, Gedeon Bendeka na Sunday Inemesit Akang, bagerageza uburyo bwashoboraga kuvamo ibitego, buka igitutu ba myugariro ba Kiyovu Sports.

Mu minota 10 AS Kigali yari imaze kubona koruneri ebyiri ndetse n’andi makosa yakorwaga n’abakina inyuma ba Kiyovu Sports n’ubwo ba rutahizamu ba AS Kigali batabashije kuyabyaza umusaruro.

Igitutu cya AS Kigali imbere y’izamu rya Kiyovu Sports cyaje gutanga umusaruro hakiri kare kuko ku munota wa 15 , Rutahizamu Sunday Inemesit Akang, yazamukanye umupira awukuye mu kibuga hagati, anyura hagati ya ba myugariro ba Kiyovu Sports, atera ishoti riremereye, Umunyezamu wa James Bienvenue Desire, agerageje kuwukurikira asanga wageze mu izamu.

Iki gitego cya AS Kigali, cyakanguye abakinnyi ba Kiyovu Sports barimo Uwiyaremye Fidali, Nsanzimfura Keddy na Mugisha Rama Joseph, bagereza gushaka uko bakwishyura ndetse ku munota wa nyuma w’igice cya Mbere, Uwimana Yakubu, yishyura igitego.

Igice cya Mbere cyarangiye amakipe yombi anganya igitego 1-1, abakinnyi bajya kuruhuka no kongera kumva inama n’amabwiriza by’abatoza.

Igice cya Kabiri cyatangiye amakipe yombi atakoze impinduka, kuko yaba Haringongo Francis utoza Kiyovu Sports na Mbarushimana Shabani utoza AS Kigali, bahisemo gukomezanya abakinnyi bakoresheje mu gice cya Mbere.

Kiyovu Sports yatangiye igice cya kabiri iri hejuru, abakinnyi bayo bisirisimba imbere y’izamu rya AS Kigali, ririnzwe na.

Ku munota wa 65, Kiyovu Sports yabonye koruneri, Nsanzimfura Keddy ayiteye ab’inyuma ba AS Kigali bongera kurenza umupira, bikomeza gutyo bigeze kuri koruneri ya Kane, Nsanzimfura ayiteye isanga Ndikumana Avit ahagaze neza ahita atsinda igitego cya Kabiri cya Kiyovu Sports, cyagiyemo ku munota wa 66.

Iminota 15 ya nyuma, abatoza bombi bakoze impinduka, bongeramo amaraso mashya, aho AS Kigali yashyizemo Kayiranga Leon na Iyabivuze Osee mu gihe Kiyovu Sports yashyizemo Nizigiyimana Abdul Karim ndetse na Ishimwe Jean Rene.

Ni impinduka zerekanaga ko AS Kigali ishaka igitego kuko yashyizemo abasatira mu gihe Kiyovu Sports yo yashyizemo abugarira.

Abakinnyi ba Kiyovu Sports, bakomeje gukina neza kugeza ku munota wa nyuma kuko umukino ubura iminota ibiri gusa ngo urangire, Nizigiyimana Abdul Karim, yazamukanye umupira awukuye mu kibuga cyabo, atera neza ishoti rigana mu rubuga rw’Umunyezamu, risanga ahagaze neza, atsinda igitego cyiza cy’umutwe.

Uyu mukino wasize Kiyovu Sports iri ku mwanya wa Karindwi, ku rutonde rw'agatenyo rwa Rwanda Premier League, mu gihe AS Kigali ari iya 13, aho irusha Rutsiro FC ya nyuma amanota 4.