Etincelles FC yatsinze Marine FC yiyongerera icyizere cyo kuguma mu cyiciro cya mbere

Etincelles FC yatsinze Marine FC yari yayakiriye ibitego 2-3 yiyongerera icyizere cyo kuguma mu cyiciro cya mbere cya BK Pro League.

Ni mu mukino wa 32 wa BK Pro League amakipe yombi yakinaga, kuri uyu wa gatndatu, tariki 16 Gicurasi 2026, wabereye kuri Sitade Umuganda amakipe yombi asanzwe yakiriraho imikino yo mu rugo.

Etincelles FC yinjiye mu mukino neza ku munota wa 12 Rodrigue Mwinyi yafunguye amazamu ku mupira mwiza yahawe ahagaze mu rubuga rw’amahina areba uko umuzamu ahagaze atera ishoti riremereye umupira uruhukira mu rushundura.

Amakipe yombi yakomeje gukinira mu kibuga hagati, kugeza ku munota wa 30, ubwo Etincelles FC yakoraga impinduka igasohora mu kibuga Nsabimana Hussein asimburwa na Dusabimana Anselme.

Ku munota wa 33, Nyarugabo Moise wa Marine FC yishyuye igitego ku mupira mwiza bateye ariruka asiga abakinnyi b'inyuma ba Etincelles FC aroba umuzamu, umupira uruhukira mu rushundura biba igitego 1-1.

Iminota 45 yarangiye y’igice cya mbere yarangiye nta zindi mpinduka, maze umusifuzi wa kane yongeraho iminota itatu itagize icyo ihindura ku mukino.

Ku munota wa 59 Nkundimana Fabio wa Marine FC yateye ishoti riremereye ari inyuma y’urubuga rw’amahina ikipe ye yari yakiriye iyobora umukino ku bitego 2-1.

Etincelles FC ntiyabahaye umwanya wo kwishimira iki gitego kuko yabokeje igitutu maze ku munota wa 60 Niyonkuru Sadjat aterekamo igitego cyo kwishyura biba 2-2.

Ku munota wa 65 amakipe yombi yakoze impinduka mu kibuga, aho Etincelles FC yasohoye Niyonkuru Sadjat asimburwa na Robert Mukogotya mu gihe Gakumba Innocent yasimbuye Ciza Hussein.

Ku munota wa 70 nabwo Etincelles FC yakoze impinduka isohora mu kibuga Niyonkuru Sadjat asimburwa na Irafasha Denys.

Ku munota wa 80 Marine FC yakoze impinduka mu kibuga yinjiza Niyonkuru Hashim asimbuye Hoziana Kennedy.

Ishimwe Djabilu wa Etincelles FC yatsinze igitego cy’intsinzi ku munota wa 83, nyuma yo kumara umwanya munini bakinira mu rubuga rw'amahina rwa Marine FC, maze umupira ukamusanga ahagaze wenyine akawutereka mu izamu.

Umufana wa Etincelles FC, Jean Claude Nelly yavuze ko amanita atatu babonye kuri Marine FC bari bayakeneye, kuko ariyo kipe ibagora cyane ndetse bibaha ikizere ko ikipe yabo itazamanuka.

Etincelles FC yahise ijya ku mwanya wa 15 n’amanota 31 izakurikizaho kwakira Al-Hilal tariki 29 Gicurasi 2026 kuri Sitade Umuganda, ni mu gihe Marine FC yagumye ku mwanya wa 8 n’amanota 41 nayo ikazakurikizaho kwakira AS Muhanga tariki 29 Gicurasi 2026.