Etincelles FC yanganyije n’Amagaju FC yuzuza imikino 8 idatsindirwa mu rugo

Etincelles FC yari yakiriye Amagaju FC zose zirwana no kutamanuka mu cyiciro cya kabiri, zanganyije 0 – 0 mu mukino wa 29 wa BK Pro League wahuje amakipe yombi, yuzuza imikino 8 idatsindirwa kuri Sitade Umuganda.

Ni mu mukino wabaye kuri uyu wa gatandatu, tariki 02 Gicurasi 2026, kuri Sitade Umuganda watangiye ku isaha ya saa 15h00.

Amakipe yakunze gukinira umupira mu kibuga hagati, mu mukino wabonetsemo uburyo butatu bwabyara igitego bwose gugaterwa ku biti by’izamu.

Amakipe yombi yakiniye mu kibuga hagati, kugeza ku munota wa 40 w’umukino, ubwo Etincelles FC yakoraga impinduka igasohora mu kibuga Nsabimana Anselme na Rwigema Pascal ikinjiza Ishimwe Djabilu na Niyonkuru Sadjat.

Ku munota wa 45 w’umukino, Etincelles FC yokeje igitutu Amagaju FC, kugeza ubwo myugariro wayo yari yitsinze igitego umupira ukagonga umutambiko w'izamu, ari nako igice cya mbere cyarangiye.

Ni nako Etincelles FC yari murugo yatangiye igice cya kabiri cy’umukino icana umuriro, nabwo ku munota wa 46 itera umutambiko w'izamu, ku ishoti riremereye ryaterewe mu rubuga rw’amahina.

Ubwo umukino waganaga ku musozo, ku munota wa 89, Shafik Bakaki w'Amagaju FC yahawe ikarita itukura nyuma yo gusagarira umusifuzi.

Uyu mukino wongereweho iminota irindwi itagize icyo yahinduye ku Mpande zombi.

Umutoza wa Etincelles FC, Bizimana Abdu ‘Bekeni’, mu kiganiro yahaye itangazamakuru nyuma y’umukino yavuze ubu amaso bayahanze imikino isigaye.

Ati “Umukino ni nkundi, kandi buri ruhande rwose ruba rushaka gutsinda, kandi turakomeza kwitegura imukino ikurikiyeho, kandi dukomeje kwishimira ko hano mu rugo tutaratsindwa, aho tudatsinze, turanganya.”

Etincelles FC yabonye inota rimwe rituma igira 27 nubwo ikiri ku mwanya wa 16 ku rutonde rw’agateganyo rwa BK Pro League ndetse ikurikiye Amagaju FC ya 15 n’amanota 28.

Etincelles FC izakurikizaho kwakirwa na Al Merrikh SC, kuwa 06 Gicurasi 2026, ikurikiwe na Rutsiro FC ifite amano 22 na AS Muhanga ifite amanita 21.