Amakipe ane ya BK Pro League yamenye abo azahura na bo mu marushanwa Nyafurika

Amakipe ane ahagarariye BK Pro League mu marushanwa Nyafurika ya 2026/27 yamaze kumenya abo azahura na bo nyuma ya tombola yabereye ku cyicaro gikuru cy’Impuzamashyirahamwe y’Umupira w’Amaguru muri Afurika (CAF) i Cairo mu Misiri, kuri uyu wa Kane tariki ya 6 Kanama 2026.

Muri CAF Champions League, APR FC izatangira urugendo ihura na Les Aigles du Congo yo muri Repubulika Iharanira Demokarasi ya Congo, mu gihe nitambuka izahura n’izakomeza hagati ya AS Port yo muri Djibouti na Zamalek SC yo mu Misiri.

Les Aigles du Congo yabonye itike yo gukina iri rushanwa nyuma yo kurangiza ku mwanya wa kabiri muri shampiyona ya DRC inyuma ya TP Mazembe yatwaye igikombe.

Muri CAF Confederation Cup, Rayon Sports yatomboye Panthère Sportive du Ndé yo muri Cameroun, amakipe yombi akaba yongeye guhura nyuma y’imyaka 11 kuko yaherukaga gucakirana mu 2015.

Panthère Sportive du Ndé ni ikipe yo mu mujyi wa Bangangté yashinzwe mu 1952. Yegukanye igikombe cy’igihugu cya Cameroun inshuro eshatu, harimo n’icyo yatwaye mu 2025 cyayihesheje itike yo gukina CAF Confederation Cup y’uyu mwaka.

Ku rundi ruhande, Al Hilal SC yatwaye BK Pro League y’umwaka ushize, yatomboye Aigle Noir SC yo mu Burundi, naho Al Merrikh SC izacakirana na Power Dynamos yo muri Zambia.

Imikino ibanza y’ijonjora rya mbere iteganyijwe hagati ya tariki ya 4 n’iya 6 Nzeri 2026, aho amakipe y’u Rwanda azabanza gukinira hanze y’igihugu. Imikino yo kwishyura izabera i Kigali hagati ya tariki ya 11 n’iya 13 Nzeri 2026.