Editorial Team
Sun, 09 Aug 2026 · 11:03 AM
2 min read

Ikipe ya Rayon Sports yongeye kwandika amateka yegukana igikombe cya CECAFA Kagame Cup 2026, nyuma y'imyaka 28 yari ishize idatwara iri rushanwa. Gikundiro yatsinze Gor Mahia FC ibitego 2-1 ku mukino wa nyuma wabereye kuri Stade Amahoro, kuri uyu wa Gatanu.


Rayon Sports yatangiye umukino isatira, mu gihe Gor Mahia ari yo yabanje kugaragaza imbaraga mu kugarira neza. Icyakora, Gikundiro yaje kubona uburyo bwiza bwo gufungura amazamu maze ku munota wa 27, Junior Kameni atsinda igitego cya mbere ku mupira mwiza yari ahawe na Iradukunda Elie Tatou.


Mbere y'uko igice cya mbere kirangira, Rayon Sports yabonye ikindi gitego, gusa umusifuzi wungirije yemeza ko Muderi Akbar yagitsinze akoresheje ukuboko, maze igice cya mbere kirangira Rayon Sports iri imbere n'igitego 1-0.

Mu gice cya kabiri, Gor Mahia yagarutse ifite imbaraga nyinshi ishaka kwishyura ndetse inakora impinduka mu bakinnyi. Igitutu yakomeje gushyira kuri Rayon Sports cyaje gutanga umusaruro ku munota wa 54, ubwo Sabuni Sirengo yatsindaga igitego cyo kwishyura, umukino uba 1-1.


Rayon Sports na yo yakoze impinduka zitandukanye mu rwego rwo kongera imbaraga mu mukino ariko iminota 90 y'umukino isanzwe yarangiye amakipe yombi anganya 1-1, bituma hongerwaho iminota 30.

Mu minota y'inyongera, Rayon Sports yongeye gusatira ishaka igitego cy'intsinzi, maze ku munota wa 96, Muhoza Daniel atsinda igitego cya kabiri cya Gikundiro yitambitse mu kirere, ku mupira mwiza yari ahawe na Tambwe Gloire.


Gor Mahia yakomeje gushaka uko yishyura, ariko uburyo yabonye ntibwayihiriye, maze umukino urangira Rayon Sports itsinze ibitego 2-1.


Iyi ntsinzi yahesheje Rayon Sports igikombe cya CECAFA Kagame Cup 2026, ikaba ari ubwa kabiri yegukanye iri rushanwa nyuma y'igikombe yatwaye mu 1998. Ni kandi ubwa mbere Rayon Sports yegukanye iri rushanwa kuva ryatangira guterwa inkunga na Perezida wa Repubulika y'u Rwanda, Paul Kagame.


Rayon Sports kandi yakoze andi mateka muri iri rushanwa, kuko yarisoje idatsinzwe umukino n'umwe.


Ku rundi ruhande, Gor Mahia yasoje iri rushanwa iri ku mwanya wa kabiri, mu gihe Al Hilal SC yabaye iya gatatu nyuma yo gutsinda Jamus SC.


Ku bijyanye n'ibihembo, Rayon Sports yatwaye 30,000 by'amadolari, Gor Mahia ihabwa 20,000 by'amadolari naho Al Hilal SC yabaye iya gatatu ihabwa 10,000 by'amadolari.