Editorial Team
Sat, 05 Sep 2026 · 9:29 PM
1 min read


Etincelles FC yari mu rugo yanganyije na SunRise FC 0-0 mu mukino wa mbere wa BK Pro League 2026/27.


Izi kipa zombi zanganyije mu mukino utagaragayeno uburyo bwinshi bubyara ibitego wabereye kuri Sitade Umuganda mu Karere ka Rubavu, kuri uyu wa gatandatu, tariki 05 Nzeri 2026.


Muri uyu mukino utari ushyushye ku mpande zombi, mu gice cya mbere cyawo Etincelles FC yagerageje uburyo bumwe bwashoboraga kubyara igitego ariko Nizeyimana Jean Claude ukina asatira umupira awutera hanze y'izamu.


Amkipe yombi yakomeje gukinira mu kibuga hagati, kugeza igice cya mbere cy'umukino kirangiye ari 0-0.

Igice cya kabiri cyatangiranye impinduka ku ruhande rwa Etincelles FC, aho yinjije mu kibuga Ishimwe Djabilu asimbuye Nizeyimana Jean Claude.


Ikipe ya Etincelles FC yifuzaga amanota atatu, ku munota wa 75 yavanye Ciza Hussein mu kibuga asimbuzwa Rwigema Pascal utagize ikinyuranyo akora.


Ku munota wa 87 ikipe ya Sunrise FC yazamukanye umupira, ku buryo bwiza bwashoboraga kubyara igitego ariko umupira wari uturutse ku ruhande rw'iburyo rwayo bawutera umutambiko w'izamu.

Iminota 90 y'umukino yarangiye amakipe yose anganyije 0-0, umusifuzi wa kane yongeraho iminota itanu y'inyongera yarangiye nta mpinduka.