Imyanzuro yafatiwe mu nama yahuje abanyamuryango ba Rwanda Premier League

Kuri iki Cyumweru, tariki 23/08/2026 kuri hateranye inama isanzwe ya Rwanda Premier League, iterana mbere y’umwaka w’imikino, yahuje abanyamuryango bose uko ari 16.

Imwe mu myanzuro yafatiwe muri iyi nama:

⁠Inama yemeje ingengo y’imari ya Rwanda Premier League y’umwaka w’imikino 2026/2027 ingana na miliyari imwe na miliyoni magana abiri na mirongo inani n’ibihumbi mirongo itanu na bitanu (1,280,055,000 FRW).

Iyi nama kandi yemeje amabwiriza agenga amakipe y’abashyitsi akomoka muri Sudani:

Mu gihe ikipe yo muri Sudani yaba iya mbere ku rutonde rwa shampiyona, izahabwa igikombe cy’icyubahiro (Honorary trophy)

Igikombe cya Shampiyona cya BK Pro League kizahabwa ikipe izaza imbere mu manota mu makipe yo mu Rwanda.

Amakipe yo muri Sudani azajya ahabwa ibihembo bijyanye n’imikino yatsinze (match winning bonus), hakurikijwe amabwiriza n’ingengo y’imari byemejwe.

Amakipe yo muri Sudani kandi azajya ahabwa ibihembo bigenerwa abakinnyi bitwaye neza, uhereye ku mukinnyi w’umukino kugeza ku mukinnyi mwiza w’umwaka, ku rwego rungana urw’amakipe yo mu Rwanda.

Umubare w’abakinnyi batari Abanya-Sudani:

Amakipe yo muri Sudani yemerewe gushyira mu kibuga icyarimwe abakinnyi batari Abanya-Sudani batarenze batandatu (6).

Ku rupapuro rw’umukino, ikipe yo muri Sudani ntizemerewe gushyiraho abakinnyi batari Abanya-Sudani barenze umunani (8).