Rutsiro FC yatsinzwe na Al Hilal SC yuzuza imikino ine nta ntsinzi

March 31, 2026

12:44 PM

Rutsiro FC idahagaze neza yatsinzwe na Al Hilal SC yuzuza imikino ine itabona intsinzi, bituma ikomeza kugana habi.

Muri uyu mukino wabereye kuri Sitade Umuganda, kuri uyu wa 28 Werurwe 2026.

Uyu mukino wamaze iminota 30, umupira ukinirwa hagati mu kibuga ndetse nta n’uburyo bukomeye bwabyara igitego amakipe yompi aremye.

Gusa ku munota wa 39, Yousouf Kabore wa Al Hilal SC yateye ishoti riremereye umupira uca iruhande rw’izamu.

Ku munota wa 43 na bwo Al Hilal SC yagerageje ubundi buryo binyuze kuri Ahmed Salem wateye ishoti riremereye umuzamu wa Rutsiro FC awufata bimworoheye.

Rutsiro FC yahise izamukana umupira ndetse Ndizeye Eric aha umupira mwiza Aligo GodsPower afungura amazamu, igice cya mbere kirangira iri imbere n’igitego 1-0.

Igice cya kabiri cyatangiranye impinduka ku ruhande rwa Al Hilal SC, Akire Templeko asohoka mu kibuga hinjira Mohamed Youssif.

Ku munota wa 47 Steve Ebuela wa Al Hilal SC yahaye umupira Kamaradini Mamudu awutera ashaka ashaka Mohamed Youssif, abakinnyi ba Rutsiro FC bawuvanamo.

Ku munota wa 52 Mumbere Mbusa Jeremie yagerageje uburyo bukomeye ku mupira yari ahawe na Mumbele Jonas, umupira uca iruhande gato rw’izamu.

Umupira wakomeje gukinirwa mu kibuga hagati, kugeza ku munota wa 62 ubwo Al Hilal SC yakoraga izindi mpinduka yinjiza mu kibuga Ernest Nsita Luzolo asimbuye Yasir Award Boshara Omer.

Al Hilal SC nyuma y’izi mpinduka yakomeje kotsa igitutu Rutsiro FC ishaka kugombora igitego yari yatsinzwe, ndetse ku munota wa 68 Mohamed Youssif yateye umupira mwiza uvuye muri koruneri ariko bawushyize ku mutwe unyura hejuru.

Ku munota wa 72 Rutsiro FC yakoze impinduka yinjiza mu kibuga Nizeyimana Jean Claude, Aligo GodsPower arasohoka.

Ku munota wa 78 Steve Ebuela wa Al Hilal SC yateye umupira uremereye, umunyezamu wa Rutsiro FC awukuramo usanga Sunday Damilare aho yari ahagaze atsinda igitego cyo kwishyura.

Ku munota wa 83 Sunday Damilare yongeye ahindukiza umunyezamu wa Rutsiro FC, ku mupira wari utewe na Mamudu Kamaradini ukubita ku ku mukinnyi wa Rutsiro FC uramugarukira.

Ku munota wa 88, Rutsiro FC yabonye uburyo bwiza bwashobora kuvamo igitego, ku mupira w'umuterekano watewe na Mumbele Jonas aha umupira Nizeyimana Jean Claude ananirwa gushyira umupira mu rucundura.

Umukino wongeweho iminota itanu itagize icyo itanga aba ari na ko urangira.

Rutsiro FC ya nyuma yakinaga umukino wa 25 yakomeje kugira amanota 20, izakurikizaho kwakirwa na Al-Merrikh, tariki 04 Mata 2026.

Ni mu gihe Al Hilal SC yakinaga umukino wa 23, iyoboye urutonde rwa Rwanda Premier League n'amanota 51, aho izakurikizaho kwakirwa n'Amagaju FC, kuwa 31 Werurwe 2026.