Editorial Team
Sun, 11 Oct 2026 · 6:47 PM
1 min read

Ikipe ya Gasogi United yatsinze Musanze FC iyisanze mu rugo kuri Stade Ubworoherane igitego 1-0, mu mukino wabaye kuri iki Cyumweru tariki ya 11 ukwakira 2026.


Ni umukino watangiye amakipe yose akinira mu kibuga hagati gusa ikipe ya Gasogi igacishamo igasatira izamu kurusha ikipe ya Musanze FC yari imbere y’abafana bayo.


Umutoza wa Musanze FC, Ruremesha Emmanuel wari wakoze impinduka muri uyu mukino ugereranyije n’indi mikino, yari yabanje mu kibuga aho yari yagiriye icyizere Malanda Destin, Hakizimana Thithy na Maniahimwe Samuel Samuel bari babanje mu kibuga bwa mbere kuva shampiyona yatangira.


Musanze FC yakomeje gukinira mu kibuga hagati ariko igice cya mbere cy’umukino kirangira nta kipe yinjije igitego mu izamu.

Igice cya kabiri cyatangiranye impinduka ku ruhande rwa Musanze FC aho ikipe yinjije Ndayishimiye Edourd mu busatirizi.


Gasogi United yari ihagaze neza mu mukino yaje kubona igitego ku munota wa 52 gitsinzwe na Abdu Nizeyimana.


Musanze FC yari mu rugo yakomeze impinduka zitanduka aho yinjije abakinnyi nka Allan Kateregga, Nonso Charles, ndetse na Bioko Christive mu busatirizi ariko Gasogi United ikomeza kwihagararaho mu bwugarizi kugeza umukino urangiye.


Gasogi United yagerageje gukora impinduka mu gice cya kabiri ikuramo  Niyigena Ebenezeri

wasimbuye Micomyiza Ramadhan, Ekouere, Herve Ngono aha umwanya M'Baye Luther Duval mu gihe Abdu Nizeyimana yasimbuwe na Thierry Byiringiro, izi mpinduka zakomeje kotsa igitutu Musanze FC ndetse zigenda zihusha uburyo butandukanye.

Gasogi United yabonye itsinzi yayo ya Mbere mu uyu mwaka w’imikino mu gihe Musanze FC yatakaje umukino wa kabiri wikurikiranya.


Musanze FC iri ku mwanya wa 15 n’amanota atatu mu gihe Gasogi United yo yazamutse iva ku mwanya wa 17 igera ku wa 14 n’amanota atatu.