Al Hilal SC yatsinze Sidama Bunna, Al Merrikh SC itsindwa na Horoya AC muri CAF Champions League

Ikipe ya Al Hilal SC yo muri Sudani isanzwe ikina BK Pro League yatsinze Sidama Bunna yo muri Ethiopia ibitego 2-0 mu mukino wabereye kuri Dire Dawa Stadium,.

Al Hilal SC yafunguye amazamu ku munota wa 11 nyuma y’uko myugariro wa Sidama Bunna witsinze igitego.

Kapiteni Mohamed Abdelrahman yatsinze igitego cya kabiri ku munota wa 90+4’ ahesha Al Hilal intsinzi y’ibitego 2-0 mbere y’umukino wo kwishyura.

Ni mu gihe Al Merrikh SC nayo muri Sudani isanzwe ikina BK Pro League yatsinzwe na Horoya AC yo muri Guinea igitego 1-0, mu mikino ibanza y’ijonjora rya kabiri rya TotalEnergies CAF Champions League wabereye kuri Stade ya 28 Septembre mu mujyi wa Conakry.

Iki gitego cyatsinzwe na rutahizamu Yakhouba Barry ku munota wa 45.

Amakipe yombi yo muri Sudani azakira imikino yo kwishyura kuri Stade Amahoro i Kigali.

Al Merrikh SC izakira Horoya AC ku wa 24 Ukwakira 2026, ishaka kwishyura igitego yatsinzwe mu mukino ubanza no gukomeza urugendo rwayo mu matsinda.

Al Hilal SC yo izakina na Sidama Bunna ku wa 25 Ukwakira 2026, ishaka kongera ku ntsinzi yabonye mu mukino ubanza kugira ngo ibone itike yo gukomeza matsinda ya CAF Champions League.