By
2 min read

Nyuma y’igihe kinini abakunzi ba Etoile de l’Est bari bamaze bategereje amanota atatu, kuri uyu wa Gatatu barayabonye nyuma yo gutsinda Musanze FC mu rugo ibitego 2-0 mu mukino w’umunsi wa munani wa BK Pro League ya 2026-27.


Ni umukino watangiye saa cyenda zuzuye utangirana imbaraga ku mpande zombi.

Ikipe ya Etoile de l’Est yabonye igitego cyatsinzwe na Arigumaho Seiri gusa nticyemewe kuko yari yaraririye.


Etoile de l’Est ntiyacitse intege yakomeje gukoresha imbaraga bidatinze ku munota wa 25 rutahizamu wayo Irigumaho Seiri yatsinze igitego ateye ngarama ku mupira yari uhinduwe na Chimamkpa Iroha Ekechi

 

Musanze FC ntiyacitse intege nayo yakomeje gushaka igitego cyo kwishyura ariko ba myugariro ba Etoile de l’Est bayibera ibamba.


Igice cya mbere cyarangiye Etoile de l’Est iri imbere n’igitego 1-0.

Igice cya kabiri cyatangiranye impinduka aho umutoza wa Musanze FC Ruremesha Emmanuel yakuyemo Mugiraneza Frodouard amusimbuza Kwihangana Cedekia

N’igice cyatangiranye imbaraga, n’ubushake aho impande zombie zashakaga igitego cyane.


Ku munota wa 52, Irigumaho Seiri yagerageje gutungura umuzamu Jean de Dieu Nsabimana wa Musanze FC ariko umupira awutera hejuru.


Ku munota wa mirongo itanu n’icyenda Allan Katerega yinjiye mu kibuga ku ruhande rwa Musanze FC asimbuye Christivie Bioko ari nako Etoile de l’Est nayo yakoze impinduka ebyiri aho Ibiok Kokoete Udo na Viane Ssekajugo bavuyemo bagasimburwa na Nyandwi Theophile na Eny Niyomugisha.

 

Ku munota wa 74 Irigumaho Seiri yaje gutsinda igitego cya kabiri ku mupira yatereye hanze y’urubuga rwa nyezamu maze Etoile de l’Est ikomeza kuyobora umukino ari nako waje kurangira.

Kugeza ubu, Etoile de l’Est iri ku mwanya wa 12 n’amanota arindwi ku rutonde rwa BK Pro League, ikazagaruka mu kibuga ku Cyumweru aho izaba yasuye Al Merrikh SC mu mukino w’ikirarane cy’umunsi wa kane naho Musanze FC ya karindwi n’amanota icyenda ikazagaruka mu kibuga tariki ya 22 Ugushyingo isura Gicumbi FC.