By
1 min read



Kiyovu Sports yatsinze Etincelles FC yo mu Karere ka Rubavu yari mu rugo izamuka ku rutonde rwa BK Pro League. Mu gihe kuri Etincelles FC ubaye umukino wa kane wikurikiranya itazi intsinzi.


Etincelles FC yatsindiwe mu mukino wabaye kuri uyu wa gatatu, tariki 04 Ugushyingo 2026, kuri Sitade Umuganda.


Iminota 30 ya mbere umupira wakiniwe mu kibuga hagati, amakipe yombi asa ni ayatinye gusatirana, dore ko nta n'uburyo bukomeye bwabyara igitego bwageragejwe ku mpande zombi.


Ku munota wa 39, Bayo Cherif wa Kiyovu Sports yafunguye amazamu ku mupira wari uvuye muri koruneri, maze Gedeon Ndonga Bivura awukuramo umusanga ahagaze neza awutera adahagaritse uruhukira mu izamu. Ari nako igice cya mbere cyaje kurangira Kiyovu Sports iyoboye n'igitego 1- 0.


Ku munota wa 58 w'umukino, Gedeon Bendeka ukina asatira ku ruhande rwa Etincelles FC wari winjiye mu kibuga asimbuye yaswase umupira ari imbere yizamu wenyine.

Kiyovu Sports yifuzaga gukomeza ikipe, yakoze impinduka ebyiri ku munota wa 68, aho Hakim Hamiss yasimbuye Nsanzimfura Keddy na Kagayo Shaban asimbura Mugisha Didier.


Ku munota wa 70 nabwo Gedeo Bendeka yongeye guhusha ikindi gitego ari wenyine, yongera kubisubiramo nabwo ku munota wa 83.


Imimota 90 y'umukino irangiye, umusifuzi wa kane Akingeneye Hicham yongereyeho iminota itanu itagize icyo ihindura ku bitego byari byabonetse mu mukino, kuko warangiye ari igitego cya Kiyovu Sports 1-0 Etincelles FC.

Mbere y'umukino Etincelles FC yari ku mwanya wa 13 n'amanota arindwi, aho yari imaze gukina imikino itandatu, mu gihe Kiyovu Sports yari ku mwanya wa 10 ni amanota arindwi ariko imaze gukina imikino itanu.


Etincelles FC izagaruka mu kibuga tariki 23 Ugushyingo 2026 yakiriye Kigali FC, mu gihe Kiyovu Sports yo izagaruka mu kibuga tariki 20 Ugushyingo 2026 yakiriwe na Gasogi United.