Al Merrikh SC yazamutse ku rutonde rwa BK Pro League itsinze Etoile de l'Est

Al Merrikh SC yanyagiye Etoile de l'Est ibitego 3-0 mu mukino w'ikirarane cy'umunsi wa kane wa BK Pro League biyivana ku mwanya wa 17 yicara ku mwanua wa karindwi.

Al Merrikh SC yari mu rugo kuri Kigali Pelé Stadium yabonye igitego cya mbere ku munota wa 12 gitsinzwe na Enock Morrison ari nacyo basozanyije igice cya mbere cy'umukino.

Mu gice cya mbere wabonaga Al Merrikh SC ifite uburyo bwo kwiharirra umupira ku kigero cya 55% kuko Etoile de l'Est nayo yageraga ubwo ikina neza hagati mu kibuga ariko uburyo bwabyara ibitego bukaba bucye.

Mu gice cya kabiri cy'umukino ari nabwo Al Merrikh SC yagize umukino mwiza yaje gutsindamo ibitego bibiri byabonetse ku munota wa 68 na 79.

Ku munota wa 68', Aboubacar Bangoura wari winjiye mu kibuga simbuye Gbane Mohammed yahiye atanga umupira mwiza wafashije Daba Sogoba gutera mu izamu mbere y'uko kandi Aboubacar Bangoura atera koruneri yahise itsindwa na Enock Morrison ku munota wa 79 mbere y'uko asimburwa na Ibrahima Traore ku munota wa 83.

Muri rusange ikipe ya Al Merrikh SC yingaje mu mukino ahanini bishingiye ku mpinduka umutoza Darko Novic yagiye akora mu gice cya kabiri agamije kubuza Etoile de l'Est gukinira mu kibuga cye no gufunga impande wabonaga ko abakinnyi nka Armel Gyslain na Osée Iyabivuze bakiniragaho.

Amanota atatu Al Merrikh SC yasaruye muri uyu mukino yatumye igeza amanota icyenda muri BK Pro League umwaka w'imikino 2026/2027 biyishyira ku mwanya wa karindwi ivuye ku mwanya wa 17.

Etoile de l'Est iheruka gutsinda Musanze FC ibitego 2-0, iri ku mwanya wa 14 n'amanota arindwi mu mikino umunani imaze gikina.