Amagaju yari yakiriye ikipe ya Al Hilal SC mu mukino w'ikirarane cy'umunsi wa 24 wa Rwanda Premier League, yatsinzwe na Al Hilal ibitego 2-1 akomeje kujya ahabi.

Ni umukino wabereye kuri Stade ya Kamena, kuri uyu wa kabiri Taliki ya 31 Werurwe 2026.

Al Hilal SC n'umutoza wayo Laurențiu Reghecampf yari yabanje mu kibuga ikipe ya mbere yakinnye imikino y'Amatsinda na 1/4 cya CAF Champions League basezerewemo na RS Berkane ku gitego 1-0.

Mu gutangira umukino, Al Hilal SC niyo yatangiye isatira izamu rya Amagaju FC aho ku munota wa gatatu gusa yabonye umupira w'umuterekano hafi y'urubuga rw'amahina, maze Kapiteni wayo Yagub Youssif awutera neza ku mutwe wa Eldin nawe awushyira mu rucundura,Twagirumukiza Clement umunyezamu wa Amagaju FC agwa mu rundi ruhande.

Guhera ku munota wa gatatu amakipe yombi yahise atangira kwiganana byatumaga mu kibuga hagati haberamo amakosa menshi ndetse no ku mpande z'amakipe yombi byumwihariko ku Amagaju FC abakinnyi bayo barimo Rwema Amza na Iradukunda Daniel bazamukaga byagoraga Steven Ebuela na Ernest Luzolo.

Ku munota wa 40 nibwo Amagaju FC yabonye igitego cyo kwishyura nyuma y’aho Twizerimana Innocent yateraga koruneri yasanze Rwema Amza atera ishoti rikomeye ,umunyezamu Mustapha Mohamed ntiyamenya ibibaye ,Amagaju FC yishura igitego. Igice cya mbere kirangira amakipe yombi anganya igitego 1-1.

Mu gice cya kabiri Al Hilal SC yagarukanye imbaraga nyinshi Umutoza akora impinduka, Yasir Boshara yinjira mu kibuga asimbuye Steven Ebuela byatumye Al Hilal SC ibona imbaraga itangira gusatira.

Ibi byatumye ku munota wa 60 Yousif Yagub azamukana umupira awuhererekanya na Sunday Demilare nawe awutanga Yasir Boshara acenga Saidi Niyitegeka wa Amagaju FC arekura ishoti, Al Hilal itsinda igitego cya kabiri ni nabwo kapiteni wa Amagaju Abdel Matumona wakonda yashwanye na Saidi bakizwa na bagenzi babo .

Al Hilal SC yari yagowe n'ikibuga cya Stade ya Kamena yakomeje kwihagararaho irangiza iminota 90 itsinze Amaju FC ibitego 2-1.

Al Hilal SC yagize amanota 54 mu mikino 24 imaze gukina naho Amagaju FC yasubiyeho inyuma umwanya umwe kuko yagumanye amanota 21 ariko ijya ku mwanya wa 17, imaze gutsindwa ibitego byinshi arimo umwenda w'ibitego 19.

Amagaju FC ku munsi wa 26 izakira Police FC kuri Stade ya Kamena nu gihe Al Hilal SC izakira Marine FC kuri Kigali Pelé Stadium.