Ikipe ya Kiyovu Sports yatsinze Gasogi United ibitego 2-0 ihita inganya amanota 42 na Rayon Sports.

Wari umukino watangiriraga umunsi wa 26 wa shampiyona, ukaba watangiye ku isaha ya Saa 15:00 ubere kuri Kigali pele Stadium. 

Umukino watangiye ikipe ya Kiyovu Sports idafite uwahoze ari umutoza wayo Haringingo Francis werekeje muri Rayon Sports ariko bikaba bitarasobanuka. 

Umukino watangiye Kiyovu Sports yihariye umukino ndetse abakinnyi barimo Uwiyaremye Fidali na Uwineza Rene nakoranagw neza ariko uburyo bw’igitego bukanga. 

Ku munota wa 9 Kiyovu Sports yabonye uburyo bw’igitego ku mupira Uwineza Rene yazamukanye neza ku ruhande rw’iburyo, awukata mu rubuga rw’amahina usanga Uwiyaremye Fidali ahagaze neza ariko umupira awushose udahagaze uca iruhande rw’izamu.

Sandja Bulaya ku munota wa 20 nawe yabonye amahirwe y’igitego ariko ateye mupira uca hejuru y’izamu gato.

Igice cya mbere cyarangiye amakipe yombi anganya ubusa ku busa gusa Kiyovu Sports yihariye umukino.

Mu gice cya kabiri, Gasogi United yakoze impinduka Kokoete Ibioko ava mu kibuga hinjira Niyigena Ebenezeri. Ibi Gasogi United yabikoze kugirago yihutishe umukino ndetse ishake ibitego kuko Ebenezeri ari mwiza mu gusimbura.

Ku munota wa 60, Rukundo Abdourahmani yafunguye amazamu ku mupira yateye uvuye kuri Kazindu Guy wawukuyeho nabi nyuma y’ishoti ryatewe na Sandja Bulaya, Kiyovu Sports iba ibonye igitego cya mbere.

Habura iminota itatu ngo umukino urangire, Uwiyaremye Fidali yashimangiye intsinzi ya Kiyovu Sports ubwo yasigaga ba myugariro ba Gasogi United, aroba umunyezamu Ndagijimana Léandre nyuma yo guhabwa umupira mwiza na Bukuru Christophe.

Iminota yarangiye ari ibitego 2 bya Kiyovu ku busaba wa Gasogi United ndetse Kiyovu itahana amanota 3. 

Kiyovu Sports yahise ifata umwanya wa kane n’amanota 42, irushwa amanota 12 na Al-Hilal SC ya mbere, gusa ikanganya amanota na Rayon Sports ikayirusha ibitego izihamye.

Ni mu gihe Gasogi United yari imaze imyaka itanu idatsindwa na Kiyovu Sports, yagumanye amanota 26 ku mwanya wa 12, ni ukuvuga amanota atanu hejuru y’ikipe ya 18.