Rayon Sports yageze ku mukino wa nyuma wa CECAFA Kagame Cup 2026

Rayon Sports yabonye itike yo gukina umukino wa nyuma wa CECAFA Kagame Cup 2026 nyuma yo gutsinda Jamus SC yo muri Sudani y'Epfo ibitego 3-1 mu mukino wa 1/2 wabereye kuri Kigali Pelé Stadium kuri wa Kabiri.

Gikundiro yatangiye umukino neza, ifungura amazamu ku munota wa 17 ku gitego cyatsinzwe na Muderi Akbar. Mu gice cya kabiri, Ibrahim Djingarey yongereye ikinyuranyo atsinda igitego cya kabiri ku munota wa 59.

Jamus SC yahise ibona igitego cyo kwishyura kimwe ku munota wa 70 gitsinzwe na Dialla Bandiougou ariko Rayon Sports ikomeza kuyobora umukino kugeza ku munota wa 88 ubwo Tambwe Gloire yatsindaga igitego cya gatatu cyashimangiye intsinzi y'ibitego 3-1.

Iyi ntsinzi yahesheje Rayon Sports kongera kugera ku mukino wa nyuma wa CECAFA Kagame Cup nyuma y'imyaka 28. Iheruka kuhagera mu 1998 ubwo yegukanaga igikombe itsinze Mlandege yo muri Zanzibar ibitego 2-1.

Rayon Sports yageze ku mukino wa nyuma idatsinzwe muri iri rushanwa, ikomeza kwerekana urwego rwiza kuva irushanwa ryatangira.

Mu wundi mukino wa 1/2, Gor Mahia FC yo muri Kenya yanganyije na Al Hilal SC igitego 1-1 mu minota 90 isanzwe, ndetse no mu minota 30 y'inyongera nta kipe yabashije kubona izamu.

Hitabajwe penaliti, Gor Mahia FC itsinda 8-7 za Al Hilal SC ihita ibona itike yo gukina umukino wa nyuma.

Rayon Sports izacakirana na Gor Mahia FC ku mukino wa nyuma uzakinwa kuri uyu wa Gatanu Saa Kumi n'Ebyiri z'umugoroba kuri Stade Amahoro. Al Hilal SC na Jamus SC bo bazahatana bahatanira umwanya wa gatatu guhera saa Cyenda z’igicamunsi.