By
2 min read

Ibitego bya Mugisha Didier na Hakim Hamiss byahesheje intsinzi Kiyovu Sports mu mukino w'umunsi wa karindwi wa BK Pro-League batsinzemo Kigali FC yasoje ari abakinnyi 10 kubera ikarita itukura yahawe Hoziyana Kennedy. 


Kuri uyu wa Gatanu tariki ya 30 Ukwakira 2026, BK Pro-League 2026-27 yari yakomeje hakinwa umunsi wa karindwi.


Umukino wabimburiye indi ari na wo rukumbi yabaye uyu munsi, ni uwo Kiyovu Sports yari yakiriyemo Kigali FC kuri Kigali Pelé Stadium. 


Ni umukino Kigali FC yatangiranye imbaraga ishaka igitego hakiri kare ari nako igerageza amahirwe atandukanye aho minota 10 ya mbere, Jeremie Basilua Makola yageragejemo amashoti abiri ariko yose agana hanze y'izamu. 


Guhera ku munota wa 15, Kiyovu Sports nayo yari yamaze kwinjira mu mukino nayo itangira gusatira ishaka igitego.


Ku munota wa 22 na 27, Moise Lola Kanda wa Kiyovu Sports yagerageje amashoti ariko ku bw'amahirwe make ntiyajya mu izamu.


Jeremie Basilua warimo ugerageza gukina neza, yaje kongera kugerageza ishoti ku munota wa 27 ariko umupira unyura hejuru gato y'izamu rya Kigali FC. 

Kiyovu Sports yarimo ishaka igitego yaje kukibona ku munota wa 36, ni ku mupira wari uvuye muri koruneri yari itewe na Nsanzimfura Keddy maze Moise Lola Kanda awukoraho, Mugisha Didier ahita ayitsindira igitego cya mbere. 


Tuyisenge Arsene na Jeremie Basilua bagerageje kureba uko bafasha ikipe yabo kwishyura iki gitego ariko amakipe yombi ajya kuruhuka ari kimwe ku busa.


Kigali FC yatangiranye imbaraga igice cya kabiri aho ku munota wa 49 iba yishyuye ariko umunyezamu James Bienvenue Desire akuramo umupira ukomeye wa Theodor Yawanendji Malipangou. 


Kiyovu Sports yakoze impinduka ebyiri ku munota wa 63 ubwo Nsanzimfura Keddy na Mugisha Didier bavagamo hakinjiramo Hakim Hamiss na Kagayo Shaban.


Izi mpinduka zafashije Kiyovu Sports kuko uko aba bakinnyi babiri bari binjiye mu kibuga, bayihesheje igitego cya kabiri.


Cyatsinzwe na Hakim Hamiss ku munota wa 68 ku mupira yari ahawe na Kagayo Shaban.


Ku munota wa 69, Kigali FC yakoze impinduka maze Patrick Baombolia aha umwanya Yeme Iyomi. 


Ni nako Jeremie Basilua, Theodor Yawanendji Malipangou na Tharcisse Nshimiyimana baje kuvamo hajyamo Fabrice Igiraneza, Dushimimana Olivier na Janvier Benedata. 

Kiyovu Sports nayo yaje gukora izindi mpinduka ebyiri ku munota wa 77, Bayo Cherif na Moise Lola Kanda bahaye umwanya Christophe Bukuru na David Gihozo. Ni nako ku munota wa 87 Nshimiyimana Obed yashimbuye Bazombwa Kilongozi. 


Hoziyana Kennedy yaje guhabwa ikarita itukura ku munota wa 90, ni nyuma y'ikosa yari akoreye Ntwari Assouman.


Umukino warangiye ari ibitego bibiri bya Kiyovu Sports ku busa bwa Kigali FC.