Rutsiro FC imaze iminsi mu mu bihe bibi, yatsinze Marine FC ibitego 5-3 iva ku mwanya wa nyuma no mu murongo utukura.

Rutsiro FC yari yakiriye Marine FC kuri Sitade Umuganda, kuri uyu wa gatandatu, tariki 28 Gashyantare 2025 saa Cyenda z’igicamunsi, yaje ikinana ishyaka ishaka amanota atatu, umwataka wayo ukina aca ku ruhande Mumbele Jonas ku munota wa 22 yafunguye amazamu, abakunzi bayo binaga ibicu.

Abafana ba Marine FC ntibyabaciye intege, kuko umurindi wari wose, maze ku munota wa 32, Hoziyana Kennedy wari mu rubuga rw'amahina ku mupira mwiza yahawe awutereka mu rushundura.

Mbonyumwami Taiba uri mubakinnyi beza ba Marine FC bakina basatira utaherukaga gutsinda igitego, ku munota wa 40 yacecekesheje abafana ba Rutsiro FC ubwo yatsindaga igitego cyiza, cyanatumye amakipe yombi ajya kuruhuka iri imbere n'ibitego 2-1.

Igice cya kabiri kigitangira amakipe yombi yagiye agerageza amahirwe yabonye ariko biba iby'ubusa, kugera ku munota wa 55 ubwo Aligo Godspower wa Rutsiro FC, yatsindaga igitego cya kabiri, amakipe yombi anganya ibitego 2-2.

Rutsiro FC yari ikeneye intsinzi ku kibi n'icyiza yakomeje kotsa igitutu Marine FC, ndetse biza kuyihira kuko ku munota wa 63 Nizeyimana Jean Claude witwaye neza aterekamo igitego cya gatatu, ndetse no ku munota wa 69 aterekamo icya kane, abafana biterera mu bicu.

Amakipe yakomeje gukinira umupira hagati, ndetse Mbonyubwami Taiba wari wahiriwe n'izamu, ku munota wa 83 yongera gushyira umupira mu rushundura, ibitego biba bibaye 4-3, abakunzi ba Rutsiro FC umutima utangira kubava mu gitereko bavuga ko wasanga mu minota isigaye bakwishyurwa.

Rutsiro FC yakomeje kwihagararaho, mu bwugarizi bugerageza kurinda iki gitego cy'intsinzi, kugeza iminota 90 irangiye ariko rutahizamu mpuzamahanga Aligo Godspower yongera gushyira abafana ibicu kuko mu minota y'inyongera, ku munota wa 92 yateretsemo agashinguracumu, umukino urangira ari ibitego 5-3.

Rutsiro FC izakurikizaho umukino izakirwamo na Gasogi United, tariki 08 Werurwe 2026, ni mu gihe umukino ubanza wahuje amakipe yombi tariki 18 Nzeri 2025 warangiye Gasogi United itsinze ibitego 3-2.

Rutsiro FC yakinaga umukino wa 21 yahise igira amanota 18, ndetse irara ku mwanya wa 15, Marine FC yakinaga umukino wa 21, yahise ijya ku mwanya wa 9 n'amanota 28, mu gihe umukino izakurikizaho izakira APR FC, tariki 07 Werurwe 2026, ndetse umukino ubanza warangiye APR FC itsinze ibitego 2-1.